Өткен жылы Абай облысының жалпы өңірлік өнімі 3,9 трлн теңгеге жетті. Ағымдағы жылдың алғашқы төрт айында қысқа мерзімді экономикалық индикатор 103,8 % құрады. Инвестициялар көлемі 19,4 %-ға өсті, ал өнеркәсіпте, өңдеу секторында, ауыл шаруашылығында, құрылыста және көлікте оң динамика сақталды.
Өңірдің инвестициялық пулы
Инвестициялық пулдағы жобалар саны 29-дан 112-ге дейін өсті. Жалпы салымдар көлемі 2,2 трлн-нан 4,4 трлн теңгеге дейін артты. Ірі нысандардың қатарында Аягөз — Бақты теміржолының құрылысы (577,5 млрд теңге), Семейдегі жаңа ЖЭО (714 млрд теңге) және тау-кен байыту комбинаты (255 млрд теңге) бар.
Облыс орталығында арнайы экономикалық аймақ құру жоспарлануда. Онда 400 млрд теңгеге өндірістік жобаларды іске асырып, 2500 жұмыс орнын ашу көзделуде. Үш ірі жоба бойынша ұсыныстар түсті.
Туризм және инфрақұрылым
Биыл Алакөл көлі жағалауының инфрақұрылымын жаңғыртуға 15,4 млрд теңге бөлінді. Оның 11,6 млрд теңгесі Мемлекеттік арнайы қордан электр желілеріне және Үржар әуежайы терминалын реконструкциялауға бағытталады.
Сондай-ақ сумен жабдықтау, кәріз және жылумен жабдықтау желілері жаңартылуда, Семейдегі жаңа көпірдің құрылысы аяқталуда, тұрғын үй құрылысы мен жол инфрақұрылымы дамуда.
Президент инвестициялар тарту жұмыстарын күшейту, экономиканы әртараптандыру, инфрақұрылымды жаңғырту және халықтың өмір сүру сапасын арттыру жөнінде тапсырмалар берді. Сондай-ақ ол «Абайға құрмет» акциясын тиісті деңгейде өткізу қажеттігіне нұсқады.