Премьер-министр Олжас Бектеновтың атынан қатысушыларды вице-премьер — ұлттық экономика министрі Серік Жұманғарин құттықтады. Ол мал шаруашылығы ауыл шаруашылығының негізгі саласы және азық-түлік қауіпсіздігінің маңызды элементі болып қала беретінін атап өтті.
Үкімет мал шаруашылығы мен ветеринарияны дамытудың бес жылдық кешенді жоспарларын бекітті. Биыл салаға жеңілдікті ұзақ мерзімді және қысқа мерзімді несиелеуге 300 млрд теңге бағытталды.
Ауыл шаруашылығы министрі Айдарбек Сапаров 2025 жылдың қорытындысы бойынша мал шаруашылығының жалпы өнімінің көлемі 3,8 трлн теңгені құрап, 3,3%-ға өскенін хабарлады. 2026–2030 жылдарға арналған жоспар аясында «Игілік», «Береке» және «Жайлау» жаңа несие өнімдері іске қосылды.
Ветеринариялық инфрақұрылымды дамытуға 66 млрд теңге қарастырылған, тағы 22 млрд теңге ветеринарлардың жалақысын арттыруға және кадрларды даярлауға жұмсалады. Салтанатты шара мемлекеттік және ведомстволық наградаларды тапсырумен аяқталды.
Фермерлер жылдық 5–6% жеңілдікті несиелерге қол жеткізді.