Цзиньчжоу қаласы Қытайдың солтүстік-шығысындағы Бохай шығанағы жағалауында орналасқан. Оның тарихы екі мың жылдан астам уақытты қамтиды, халқы шамамен үш миллион адамды құрайды. Ірі теңіз портының арқасында қала көлік-логистикалық және сауда орталығы ретінде дамып келеді.
Делегация бірнеше өнеркәсіп алаңдарын аралап, заманауи технологиялармен танысты. Негізгі кездесу PetroChina Jinzhou Petrochemical Company зауытында өтті. Атқарушы директор Юань Цинбинь кәсіпорынның дамуы мен қуаттылығы туралы айтып берді.
Компанияның жылдық табысы 30 млрд юаньнан асады, өндірісте алты мыңнан астам адам жұмыс істейді. Зауыт электромобиль аккумуляторлары мен металлургияға арналған жоғары берік көміртекті материалдар шығару бойынша әлемде жетекші орын алады. Сонымен қатар кәсіпорын смартфондар мен микрочиптерді тазартуға қолданылатын G3 және G5 класты электрондық техникалық спирт өндіреді. Бұл Қытайға осындай өнім импортына тәуелділікті азайтуға мүмкіндік берді. Зауытта цифрлық шешімдер енгізілген және процестер толық автоматтандырылған.
Батыс Қазақстан облысы әкімінің орынбасары Тлепберген Каюпов өңірдің инвестициялық әлеуеті және экономиканы әртараптандыру қажеттілігі туралы айтты. Төрт айдың қорытындысы бойынша негізгі капиталға салынған инвестиция көлемі 182,6 млрд теңгеге жетіп, өткен жылдың сәйкес кезеңімен салыстырғанда 17 пайызға артқан. Облыс Қытайдың бес провинциясымен ынтымақтасады. Жақында Орал мен Цзиньчжоу қалалары бауырлас қалалар атанған.
Тараптар ынтымақтастықты жалғастыруға дайын екендіктерін растап, ықтимал бірлескен жобаларды пысықтауға келісті.