2025 жылдың қорытындысы бойынша Қазақстанның ЖІӨ 6,5 %-ға өсті. Нақты сектор 8,7 %-ға, қызмет көрсету саласы 5,2 %-ға артты. Негізгі үлес көлік, құрылыс, сауда, тау-кен және өңдеу өнеркәсібі, сондай-ақ ауыл шаруашылығы салаларына тиесілі.
Негізгі капиталға инвестициялар
Алғашқы төрт айда негізгі капиталға инвестициялар 6,7 %-ға өсіп, 4,9 трлн теңгеге жетті. Бұл көрсеткіш жалпы экономика өсімінен озып отыр.
2025 жылы тікелей шетелдік инвестициялардың жалпы ағыны 20,5 млрд долларды құрады — бұл өткен жылмен салыстырғанда 14,4 %-ға артық.
Рейтингтер және қолдау жүйесі
Moody’s, Standard & Poor’s және Fitch халықаралық агенттіктері елдің егемендік рейтингін инвестициялық сенімділік деңгейінде сақтап отыр.
Қазақстанда инвесторларды шетелдік өкілдіктерден бастап өңірлік деңгейге дейін сүйемелдеудің кешенді жүйесі жұмыс істейді. Әр өңірде нақты жобалары бар инвестициялық бағдарламалар бекітілген. Жобалар іріктелгеннен кейін шетелдегі қазақстандық өкілдіктер арқылы инвесторларды іздеу бойынша мақсатты жұмыс жүргізіледі.
Қорғау тетіктері және жеңілдіктер
Негізсіз тексерулерді шектейтін «прокурорлық сүзгі» енгізілді. Басым жобалар үшін Fast Track механизмі — рұқсаттар мен мемлекеттік қолдау шараларын жедел алу жұмыс істейді. Өңірлерде инвестициялық штабтар әрекет етеді және инвесторлардың проблемалық мәселелерінің бірыңғай тізілімі қалыптастырылуда.
Компанияларды тіркеуді eGov порталы арқылы онлайн өтуге болады. Инвесторлар инвестициялық келісімшарт шеңберінде салықтық және кедендік преференциялар, субсидиялар, заттай гранттар және басқа да қолдау шараларын алады.
Арнайы аймақтар және мұнай-газ
Елде дайын инфрақұрылымы мен жеңілдікті жағдайлары бар 18 арнайы экономикалық аймақ және 67 индустриялық аймақ жұмыс істейді. Мұнай-газ саласы үшін фискалдық ынталандырулары және халықаралық арбитраж мүмкіндігі бар жетілдірілген үлгілік келісімшарт қолданылады.
Өткен жылдың желтоқсанында 2030 жылға дейінгі инвестициялық саясат тұжырымдамасы бекітілді. Қолдаудың негізгі шаралары сақталды, сонымен бірге инвестицияларды тарту жүйесін жетілдіру бойынша өзгерістер енгізілді.