Кездесулер үкімет басшысының Қытайға жұмыс сапары аясында өтті. Тараптар басым салаларда инвестиция тарту, өндірістерді локализациялау және технологияларды беру мүмкіндіктерін қарастырды.
Ирригация және ауыл шаруашылығы
Yulin Irrigation компаниясының бас директоры Ци Юбомен заманауи суару жүйелерін енгізу және Қызылорда облысында жабдықтарды құрастыру мәселелері талқыланды. Қазақстан аграрлық сектордың өнімділігін жаңа технологиялар арқылы арттыруды көздеп отыр.
Көмір химиясы және металлургия
Xiamen Wanli Stone компаниясының төрағасы Ху Цзиньпэимен «көмір–электр энергиясы–химия–металлургия» біріктірілген тізбегінің жобасы қаралды. Көмірді жартылай коксқа, сутек пен мұнай өнімдеріне қайта өңдеу, сондай-ақ сирек металдарды терең өңдеу жоспарлануда.
Дата-орталықтар және жасанды интеллект
SuperX AI Technology Limited компаниясының басшысы Хуан Чэньхунмен қуаты 1 ГВт-қа дейін жететін AI Data Center кластерін құру туралы уағдаластыққа қол жеткізілді. Жобаны 2026–2029 жылдары кезең-кезеңімен іске қосу көзделген. Кездесу қорытындысы бойынша Премьер-министр жобаны пысықтау үшін жұмыс тобын құруды тапсырды.
Өнеркәсіптік аймақтар және логистика
Jinyi Holding Group компаниясының төрағасы Цзинь Пэнмен Ақтөбе облысында индустриялық-логистикалық парк құру мәселесі талқыланды. Компания Қазақстанда Ақтөбеде жасыл мыс зауытын және Батыс Қазақстан облысында логистикалық хабты іске асырып жатыр.
Автокөлік құрылысы
Guangzhou Automobile Group компаниясының басшысы Фэн Синьямен автомобиль жеткізуден оларды жергілікті өндіруге көшу мәселесі қаралды. 2026–2028 жылдары 17 мың көлік, оның ішінде гибридті модельдер шығару жоспарлануда.
Аккумуляторлар және энергетика
CATL компаниясының негізін қалаушы Цэн Юйцюньмен аккумулятор батареялары мен энергия жинақтау жүйелерін өндіруді құру, шикізатты қайта өңдеу және пайдаланылған батареяларды утилизациялау мәселелері талқыланды.
Металлургия
CISDI Engineering компаниясының вице-президенті Юн Люмен шойынды десульфурациялау жобасын іске асыру және компанияның құю-прокат кешенін салуға қатысу мүмкіндігі туралы уағдаласты.
Кездесулер қорытындысы бойынша Олжас Бектенов Қазақстан локализацияға және қосылған құны жоғары өнім шығаруға бағдарланған инвесторлардың ұзақ мерзімді жұмысына қажетті жағдайларды қамтамасыз етуге дайын екенін мәлімдеді. Тиісті ведомстволар мен Kazakh Invest-ке жобаларды сүйемелдеу тапсырылды.