Төмен көміртекті даму тұжырымдамасына сәйкес, ел жаңартылатын энергия көздері негізінде генерацияны айтарлықтай арттыруды көздеп отыр. Қазіргі уақытта Қазақстанда жалпы қуаты шамамен 3,7 ГВт болатын 169 жаңартылатын энергетика нысаны жұмыс істеп, электр энергиясы өндірісінің шамамен 7%-ын қамтамасыз етеді.
Жобаларды іске асыруға Қытай, БАӘ, Франция және Германия компаниялары тартылған. «Каспий жасыл энергетикалық дәлізі» жобасына ерекше назар аударылуда, оны Қазақстан Әзірбайжан және Өзбекстанмен бірге дамытуда.
Әзірбайжанмен ынтымақтастық
Ерлан Аккенженов Баку-Тбилиси-Джейхан бағытын стратегиялық маңызды деп атады. Осы бағыт бойынша қазақстандық мұнай тасымалы жылына 1,5 млн-нан 2,2 млн тоннаға дейін артады. Бұл ретте КТК ірі экспорттық маршрут болып қала береді: 2025 жылы консорциум арқылы 64,8 млн тонна мұнай өтті.
Басқа бағыттар
Қазақстан сондай-ақ «жасыл» сутегін өндіру жобаларын, соның ішінде Маңғыстау облысындағы Hyrasia One-ді дамытуда және шығарындыларды азайту үшін «таза көмір» технологияларын енгізуде.
Бакудегі энергетикалық аптаның іс-шаралары 1–3 маусымда Әзірбайжанда өтеді. Форум аясында Қазақстан мен Түркия мұнай-газ химиясы және энергетика саласындағы ынтымақтастық перспективаларын талқылады.