Көрмеде Австралия, Германия, Италия, Қазақстан, Канада, Қытай, Ресей, Сауд Арабиясы, АҚШ, Өзбекстан, Финляндия, Франция, Чехия, Швеция және Эстония елдерінің қатысушылары жиналды.
Олжас Бектенов қазақстандық және шетелдік компаниялардың, соның ішінде Qarmet, Kazzinc, Kazakhmys, KAZ Minerals, XCMG, сондай-ақ АҚШ, Швеция және Сауд Арабиясы компаниялар топтарының стендтерімен танысты.
Қонақтарға тау-кен металлургия саласына арналған технологиялық шешімдер, өндірістерді жаңғырту, цифрландыру, автоматтандыру, экологиялық және өнеркәсіптік қауіпсіздікті арттыру, сондай-ақ қайта өңдеу мен инженерлік қызметтерді дамыту жобалары көрсетілді.
Пленарлық сессияда сөз сөйлеу
Бұған дейін Премьер-министр сала дамуын талқылау үшін әр түрлі елдердің, бизнестің және сарапшылардың өкілдерін жыл сайын жинайтын конгресте сөз сөйледі. Биыл форумға 16 елден 1,5 мыңнан астам делегат келді.
Олжас Бектенов Қазақстан экономикасы 2025 жылдың қорытындысы бойынша 6,5%-ға өскенін хабарлады. Ол жаңа кен орындарын ашу және минералдық-шикізат базасын кеңейту үшін геологиялық барлаудың маңыздылығын атап өтті.
Премьер-министрдің сөзіне қарағанда, саланың дамуы тек өндіруді арттырумен шектелмейді. Стратегиялық міндет — Қазақстанды тек шикізат жеткізуші емес, әлемдік нарықтар үшін бәсекеге қабілетті өнеркәсіп өнімін өндіруші ететін жаңа модель құру.