Мемлекет басшысы елде жаңа Құрылыс және Су кодекстері қабылданғанын хабарлады. Бұл құжаттар салаларды реттеу үшін стратегиялық маңызға ие.
Өткен жылы Қазақстанда 20 млн шаршы метрден астам тұрғын үй пайдалануға берілді. Көрсеткіш ел тарихындағы ең жоғары нәтиже болды. Қасым-Жомарт Тоқаев мыңдаған отбасының жеке үйлері мен пәтерлеріне ие болғанын атап өтті.
Ауылдарды сумен қамтамасыз ету
Биыл ауылдық елді мекендерді ауыз сумен қамтамасыз ету бойынша 12 ірі жобаны аяқтау жоспарлануда. Осы жобалардың арқасында 500 мыңнан астам ауыл тұрғыны таза суға қол жеткізеді.
АӨК-ні қолдау
Өткен жылы агроөнеркәсіптік кешенді жеңілдікпен қаржыландыруға бір трлн теңге несие ресурстары тартылды. Фермерлер алғаш рет жылдық 5%-бен ұзақ мерзімді қарыздарға қол жеткізді. Бұл ауыл шаруашылығын жаңғыртуға мүмкіндік берді: АӨК жалпы өнімінің көлемі 10 трлн теңгеге жуықтады.
АӨК өнімдерінің экспорты 1,3 есе өсіп, 7 млрд долларды құрады. Нәтиже соңғы онжылдықтағы ең үздік көрсеткіш болды.
Фармацевтика
Дүниежүзілік денсаулық сақтау ұйымының бағалауы бойынша Қазақстан ТМД елдері арасында фармацевтикалық индустрияға деген сенім деңгейі бойынша бірінші орынға шықты. Дәрі-дәрмек нарығының көлемі бір трлн теңгеден асты. Соңғы үш жылда салаға шетелдік инвестициялар көлемі үш еседен астам өсті.
Президент жоғары технологиялық салалар мен отандық фармацевтикадағы оң динамиканы атап өтті. Сонымен бірге ол қол жеткізілген нәтижелерге тоқтап қалуға болмайтынын және күрделі міндеттерді шешу қажеттігін мәлімдеді.