Энергетика министрі Ерлан Аккенженов мұнай өңдеу зауыттары жоспар бойынша жұмыс істеп жатқанын, бензин, дизель отыны және авиаотын қорлары ел ішіндегі қажеттілікті толық қамтамасыз ететінін хабарлады. Министрлік өндіріс пен жеткізілімдерді қадағалауды жалғастыруда.
Ішкі істер министрі Ержан Саденов жыл басынан бері автокөлік өткізу пункттерінде 40 мың литрден астам көлемдегі мұнай өнімдерін әкетудің 593 әрекеті тоқтатылғанын айтты. Шекара маңындағы аймақтарда жол картасы аясында бақылау күшейтіліп, тексерулер үшін қызметкерлер саны арттырылды.
Қаржы вице-министрі Ержан Биржанов шекара маңындағы трассаларды тәулік бойы патрульдейтін мобильді топтардың жұмысы туралы баяндады. Соңғы екі тәулікте олар қосымша бактар мен канистрлерде үш тоннадан астам отынды әкетудің 61 әрекетін тоқтатқан. 18 арнайы көлік құралы тексерілді, олардың біреуінен 34 тонна мұнай өнімінің сынамалары сараптамаға алынды. Қазір қызмет көлемі айтарлықтай өскен 62 автожанармай құю станциясы мен 22 шағын мұнай өңдеу зауытының қызметі талдануда.
Кеңесте сондай-ақ ҚР ҰҚК төрағасының орынбасары Ерлан Алдажуманов, ҚР Бәсекелестікті қорғау және дамыту агенттігі төрағасының бірінші орынбасары Рустам Ахметов және Қаржылық мониторинг агенттігі төрағасының орынбасары Қайрат Бижанов сөз сөйледі.
Кездесу қорытындысы бойынша Олжас Бектенов ішкі мұнай өнімдері нарығының тұрақтылығын қамтамасыз етуді басым міндет деп атады және мемлекеттік органдарға жағдайды күн сайын бақылауда ұстауды тапсырды.