Іс-шараға мемлекеттік органдардың, инвестициялық қорлардың, қаржы институттарының, сондай-ақ Қазақстан мен Қытайдың девелоперлік және технологиялық компанияларының өкілдері жиналды.
Қатысушыларға Алатау қаласының даму бағыттары, инвесторлар үшін жеңілдікті жағдайлар және арнайы құқықтық режим шеңберінде «бір терезе» қағидаты бойынша жобаларды сүйемелдеу туралы айтылды.
Шэньчжэньнің инновациялар мен цифрлық басқарудағы тәжірибесіне ерекше назар аударылды. Бұл тәжірибелер қазақстандық қаланың құрылысында қолданылмақ.
Роуд-шоу барысында China Resources, Ping An Group, China State Construction Engineering Corporation International, Funde-Gemdale Group, China International Marine Containers Group, Sunwah Group және SINOMACH Hainan Development қоса алғанда ірі қытайлық корпорациялардың басшылығымен кездесулер өтті.
Тараптар қытай бизнесінің Алатау инфрақұрылымдық жобаларына қатысуын, өндірістерді локализациялауды, технологияларды беруді және урбанистика саласындағы тәжірибе алмасуды талқылады.
Нәтижесінде өнеркәсіп, энергетика, логистика, жоғары технологиялар және цифрлық экономика салаларындағы бірлескен жобалар туралы 24 келісімге қол қойылды.
Роуд-шоу халықаралық бизнестің Алатаудың дамуына қызығушылығын көрсетті. Келесі кездесулер Гонконгте инвестициялық қорлармен, банктермен, сақтандыру компанияларымен және технологиялық компаниялармен жоспарланған.