Астанада өткен Шетелдік инвесторлар кеңесінің отырысында мемлекет басшысы Қазақстан технологиялық трансформацияда көшбасшылыққа қол жеткізу үшін институционалдық негіз қалыптастырып, озық әрекет ететінін атап өтті.
Мектептер мен зертханалар
Alem.ai халықаралық орталығының базасында TUMO және Tomorrow School жаңа буын екі мектеп ашылды. Telegram және Presight қоса алғанда, серіктестермен бірлесіп заманауи зерттеу зертханалары іске қосылды.
Білім беруге ЖИ енгізу туралы Жарлық
Жақында президент орта білім беруді жаңғыртудың орталық элементі жасанды интеллект болатын Жарлыққа қол қойды. Технология мұғалімдердің мүмкіндіктерін кеңейтетін құрал ретінде қолданылады, оларды алмастырмайды.
Құжатта жекелендірілген оқытудың тетігін құру, цифрлық инфрақұрылымды нығайту, нормативтік базаны жетілдіру және білім беру стандарттарын жаңарту көзделген.
Кейін бүкіл елге таратылатын пилоттық жоба басталады. Оның мақсаты — қалалық және ауылдық мектептер арасындағы алшақтықты қысқарту және әрбір балаға ЖИ дәуірінде сапалы білім алуға қолжетімділікті қамтамасыз ету.
Мемлекеттік қызметшілерді оқыту және жаңа ЖОО
Жасанды интеллектті дамыту кеңесінің мүшесі, әлемге танымал сарапшы доктор Ли Кай Фу Alem.ai орталығында мемлекеттік органдардың жоғары басшылығына арналған оқыту семинарын өткізді. Семинар мемлекеттік басқаруда ЖИ-ді стратегиялық қолдануға, ЖИ-агенттерге және ұлттық технологиялық стекті дамытуға арналды.
Мемлекеттік қызметшілерді тұрақты оқыту бағдарламалары технологияларды енгізуді жеделдетуге көмектеседі. Сонымен қатар Қазақстанда өңірдегі алғашқы мамандандырылған жасанды интеллект университеті құрылады, ол зерттеулер мен кадр даярлаудың орталығына айналады.