Жаңа қағидаларға сәйкес, босқын ретінде нәсіліне, ұлтына, дініне, азаматтығына, белгілі бір әлеуметтік топқа жататындығына немесе саяси сенімдеріне байланысты қудалаудан қорқу негізінде өз елінен тыс жерде жүрген шетелдік азамат немесе азаматтығы жоқ адам танылады.
Мәртебе беру туралы жазбаша өтінішті халықты жұмыспен қамту мәселелері жөніндегі жергілікті атқарушы органдарға беру қажет. Мұны Қазақстанға келгеннен кейін немесе адам қудалауға әкелуі мүмкін жағдайлар туралы білген сәттен бастап бес күнтізбелік күн ішінде жасау талап етіледі.
Өтінішке өтініш берушінің жеке басын куәландыратын құжаттарды қоса беру қажет.
Пана іздеуші адамның куәлігін беру тәртібі нақтыланды. Мұндай құжат енді 18 жастан асқан шетелдіктер мен азаматтығы жоқ адамдарға үш ай мерзімге беріледі. Ол босқын ретінде тану мәселесін қарау кезеңінде елде болудың заңдылығын растайды.
Отбасымен қосылу үшін өтініш берген кезде өтініш беруші туыстық байланыстарды растайтын құжаттарды ұсынуы тиіс. Пана іздеуші адаммен және ол келген адаммен сұхбаттар бөлек өткізіледі.
Өзгерістер 2026 жылғы 18 шілдеде күшіне енеді.