Құжат байланыс қызметтерінің сапасы мен қолжетімділігін арттыруға бағытталған. Азаматтар телефонның нөлдік балансы кезінде де әлеуметтік маңызы бар сервистерді пайдалана алады.
Құрылғыларды верификациялау және 112 қызметі
Абоненттік құрылғыларды верификациялау функциялары Мемлекеттік радиочастоталық қызметке беріледі. Бұл телефондардың заңды айналымын қамтамасыз етуге және көлеңкелі импортты қысқартуға тиіс.
Түзетулер сондай-ақ «112» бірыңғай кезекші-диспетчерлік қызметінің жұмысын күшейтіп, оған төтенше жағдайларға ден қою үшін қосымша құралдар береді.
Байланыс инфрақұрылымын дамыту
Байланыс объектілерін, оның ішінде антенна-мачталық құрылыстарды салу рәсімдері жеңілдетіледі. Бұл ауылдық және шалғай аудандарда мобильді байланыс пен интернеттің қамтуын тезірек кеңейтуге мүмкіндік береді.
Заң Қазақстанды өңірлік цифрлық хаб ретінде дамыту үшін халықаралық трафиктің транзитін қарастырады.
Деректерді өңдеу орталықтары және инвестициялар
Деректерді өңдеу орталықтары стратегиялық объектілерге жатқызылады. Оларды пайдалануға беру хабарлама тәртібімен жүргізіледі, бұл мемлекетке есепке алуды жүргізуге және қауіпсіздік мәселелері бойынша өзара іс-қимылды қамтамасыз етуге мүмкіндік береді.
Электр станцияларын жаңғыртуға жеке инвестицияларды тарту механизмі енгізіледі. Деректерді өңдеу орталықтары мен цифрлық майнинг субъектілері мемлекеттің салынған қаражатты қайтару міндеттемелерінсіз электр энергиясының ұзақ мерзімді тұтынушылары ретінде әрекет ете алады.
Бұған дейін Павлодар облысында «Долина ЦОДов» құрылысы басталған.