Қылмыстық рақымшылық теріс қылықтар, жеңіл және орташа ауыр қылмыстар туралы істерге қатысты болады. Егер залал болмаса немесе ол толық өтелсе, іс тоқтатылады. Осындай баптар бойынша сотталғандар босатылады, ал орташа ауыр қылмыстар бойынша өтелмеген мерзім жартысына қысқартылады. Ауыр және аса ауыр қылмыстар бойынша да мерзімдер азайтылады.
Рақымшылық кімдерге қатысты болмайды
Рақымшылық сыбайлас жемқорлық, терроризм, экстремизм, кәмелетке толмағандардың жыныстық қолсұғылмаушылығына қарсы қылмыстар, азаптау және рецидив үшін сотталғандарға қолданылмайды. Әрбір іс бойынша түпкілікті шешімді сот қабылдайды.
Әкімшілік рақымшылық
Әкімшілік айыппұлдардан Қазақстан азаматтары, жеке кәсіпкерлер, жеке нотариустар, сот орындаушылары, адвокаттар және заң консультанттары босатылады. Рақымшылық соттар салған айыппұлдарға және азаматтар мен мемлекеттің қауіпсіздігіне қауіп төндіретін құқық бұзушылықтарға қатысты болмайды.
Жергілікті атқарушы органдар босатылғандардың әлеуметтік бейімделуімен айналысады. Заңды қабылдау қосымша бюджет шығындарын талап етпейді.