2026 жылғы 12 шілдеден бастап тізімді қалыптастыру кезінде жаңартылған «Электрондық еңбек биржасы» цифрлық платформасы қолданыла бастайды. Бұл Әлеуметтік кодекске сәйкес жұмыс іздеуге, қызметкерлерді іріктеуге және жұмыспен қамту қызметтерін электрондық форматта көрсетуге көмектесетін бірыңғай жүйе.
Тізім «Шетелдік жұмыс күші» автоматтандырылған жүйесінің деректері, кадрларға қажеттіліктің орта мерзімді болжамы және «Электрондық еңбек биржасы» порталындағы бос орындар негізінде құрастырылады.
Бұйрық 2026 жылғы 12 маусымда, жекелеген тармақтарды қоспағанда, күшіне енеді. Тізімге денсаулық сақтау, инженерия, цифрлық технологиялар, білім беру және креативті индустриялар мамандары кіреді.
Денсаулық сақтау блогында нейрохирургтар, гематологтар, онкологтар, неонатологтар, эндокринологтар, анестезиолог-реаниматологтар және акушер-гинекологтар көрсетілген.
Инженерлік-техникалық блокқа авиация, ғарыш технологиялары, фармацевтика өнеркәсібі, лазерлік жабдықтар және жаңа өндірістік технологиялар мамандары кіреді.
Цифрлық салада бағдарламалық қамтамасыз ету әзірлеушілері, жасанды интеллект және үлкен деректер бойынша сарапшылар, ақпараттық жүйелер архитекторлары, киберқауіпсіздік және бұлтты есептеулер бойынша инженерлер тізімделген.
Сондай-ақ тізімге графикалық дизайнерлер, суретші-иллюстраторлар, видеомонтажерлер және дыбыс операторлары енді.