Табиғи ресурстар және табиғат пайдалануды реттеу басқармасының басшысы Әсел Аманбекқызы биыл акцияның түрлі іс-шараларына 60 мыңнан астам адам қатысқанын хабарлады. Акциялар барысында 21 мыңнан астам ағаш отырғызылып, 6 мың тоннадан астам қалдық шығарылды.
Облыста сенбіліктер, экологиялық фестивальдер және аймақаралық форум өтті. Экологиялық мәдениетті арттыру бойынша 85 іс-шарадан тұратын жоспар бекітілді. TazaQazBot жүйесі арқылы азаматтардың өтініштері қабылданып, олардың көпшілігі орындалды. Сондай-ақ рұқсатсыз қоқыс тастайтын орындарды жою және табиғи аумақтарды қорғау жұмыстары жүргізілуде.
Шығарындыларды азайту және қоқыс тастайтын орындарды жою
Экология департаментінің мәліметінше, I санаттағы кәсіпорындарда ластаушы заттардың шығарындыларының көлемі 147,9 мың тоннадан 100,4 мың тоннаға дейін қысқарды. Ғарыштық мониторинг арқылы анықталған заңсыз қоқыс тастайтын орындарды жою деңгейі 96%-ға жетті. Қалдықтарды заңсыз төгуге жол бермеу бойынша жүйелі жұмыс жалғасуда.
Ескерткіштерді сақтау
Мәдениет басқармасының басшысы Нұртас Сали өңірде мемлекеттік қорғауда 601 ескерткіш бар, тағы 833 нысан алдын ала есепке алынғанын баяндады. Оларды қорғау үшін қорғау аймақтары бекітіліп, бірқатар нысандарға қоршаулар мен ақпараттық тақталар орнатылды. Биыл бес ескерткіште ғылыми-реставрациялық жұмыстар басталып, оларды тамызда аяқтау жоспарлануда.
Археологиялық зерттеулер мен қазба жұмыстары, сондай-ақ жекелеген нысандарды ЮНЕСКО тізіміне енгізу жұмыстары жалғасуда. Кеңеске қатысушылар ескерткіштерді қорғауды күшейту және олардың сақталуына жауапты мамандар санын арттыру қажеттігін атап өтті.
Жиын қорытындысы бойынша әкім Нұрдаулет Қылыбай «Таза Қазақстан» бастамасын жүйелі іске асыруды жалғастыруды, экологиялық бақылауды күшейтуді және тарихи-мәдени мұраны сақтау бойынша қосымша шаралар қабылдауды тапсырды.