Салтанатты рәсімде он төрт сертификат тапсырылды. Бұл елдің барлық күштік құрылымдары арасындағы ең үздік нәтиже.
Ішкі істер министрінің орынбасары — Ұлттық гвардияның Бас қолбасшысы генерал-лейтенант Ансаган Балтабеков жеңімпаздарға құжаттарды жеке өзі тапсырды. Ол жобаға қатысу жастарға нақты перспективалар ашатынын атап өтті.
«Бүгін сертификат алған әрбір әскери қызметші бұл нәтижеге өзінің еңбегімен және білімге ұмтылысымен қол жеткізді. Болашақта дәл осындай жастар білікті мамандар, сұранысқа ие кадрлар және мемлекетіміздің сенімді тірегі болады», — деді А. Балтабеков.
Ұлттық гвардияның мерзімді қызметтегі әскери қызметшілерінің 60 пайызы бағдарламаға қатысу ниетін білдірді. Құқық тәртібі әскерлерінің төрт мыңға жуық жауынгері өтініш берді. Жеңімпаздар жауынгерлік дайындық, тәртіп және арнайы тапсырмаларды орындау бойынша ең үздік нәтиже көрсеткендер болды. Қорытынды рейтинг грант алатындарды анықтады.
Бағдарлама жеңімпаздары тегін оқиды, стипендия алады және жатақханада орын алады. 70-тен астам қазақстандық жоғары оқу орны мұндай студенттерді қабылдау туралы меморандумдарға қол қойды.