Депутат фракция отырысында ымдау тілін заңнамалық деңгейде тану есту қабілеті бұзылған адамдардың мәселелерін шешуге негіз болатынын мәлімдеді.
Қазір мұндай азаматтар білім алу, жұмысқа орналасу, мемлекеттік қызметтерді алу және мәдени-спорттық іс-шараларға қол жеткізу кезінде қиындықтарға тап болады. Жоғары оқу орындарында есту қабілеті бұзылған 180-ге жуық студент оқиды, колледждерде – 584 адам, ал бұл санаттағы адамдардың жалпы саны 32 мыңға жуық.
Мектептегі білім беруде балаларға кейде ымдау тілін пайдалануды шектейді. Елімізде барлығы 24 сертификатталған сурдоаудармашы жұмыс істейді, ал соңғы бес жылда 295 сурдопедагог дайындалды.
Әлеуметтік кодекске ымдау тілі ұғымын айқындайтын нормалар енгізілген. Сенат түзетулерді қабылдағаннан кейін жұмысты жалғастырып, тиісті ережелерді Тілдер туралы заңға, Білім туралы заңға және басқа салалық актілерге енгізу жоспарлануда.
Отырыс қорытындысы бойынша фракция ұсыныстары Премьер-министрге қарауға жіберіледі.