Шымкентте кенелерге қарсы жоспарлы өңдеу наурыздан мамырға дейін жүргізілді. Жұмыстарға алты бригада — 18 маман және «Ветеринарлық қызмет» коммуналдық кәсіпорнының арнайы техникасы қатысты.
Қаладағы ауыл шаруашылығы және ветеринария басқармасы басшысының орынбасары Қайрат Базарбековтың айтуынша, осы шаралардың арқасында қауіпті инфекциялардан аулақ болуға мүмкіндік туды. Өтініштер саны өткен жылғыдан аз болды: 2025 жылдың бес айында 636 жағдай тіркелді.
Эпидемиологтардың нақтылауынша, шағулардың көпшілігі қала шегінен тыс — табиғатта демалу немесе көрші аймақтарда малмен жұмыс істеу кезінде болған.
2026 жылы 4,6 млн шаршы метр аумақты, оның ішінде мал қораларын, скверлер мен парктерді өңдеу жоспарлануда. Сондай-ақ 152 мыңнан астам ауылшаруашылық жануарлары өңделеді.