700 мм диаметрлі жылу магистраліне ерекше назар аударылуда, ол 1980 жылы пайдалануға берілген. Қазіргі уақытта оның тозуы 61%-ды құрайды. Жоба үш кезеңге есептелген және 2029 жылға дейін аяқталуы тиіс. Жаңарту жоспарланған учаскелердің жалпы ұзындығы – 8,7 км. Жұмыстар аяқталғаннан кейін тозу 38%-ға дейін төмендейді.
Биыл 3,5 км ұзындықтағы бірінші кезең іске асырылады. Бүгінгі күні 800 метр орындалды — жоспарланған көлемнің 25%-ы. Кезең қорытындысы бойынша жылу магистралінің тозуы 51,8%-ға дейін азаяды. Бұл жылумен қамтамасыз етудің сенімділігін арттырып, жылыту маусымындағы апаттардың ықтималдығын азайтуы тиіс.
Жалпы ел бойынша 2025 жылы 377 км жылу желілерін реконструкциялау және күрделі жөндеу жоспарланған, оның ішінде 130 км — Ұлттық жоба аясында. Жұмыстар 16 өңірде 152 км-де жүргізілуде, оның 35 км-і аяқталған.
Энергетика министрлігінің Мемлекеттік энергетикалық қадағалау және бақылау комитетінің аумақтық департаменттері нысандарды жылыту маусымына дайындау барысын және жөндеу кестелерінің сақталуын қадағалайды.